Фото: t.me/kolikpress
Қазақстанның азаматтық авиация саласы дамудың жаңа биігіне көтерілмек. Еліміздің әуежайлары енді ең озық цифрлық жүйелермен және инновациялық биометриялық сәйкестендіру технологияларымен жабдықталып, жолаушылар үшін мүлдем жаңа жайлылық деңгейіне шығады.
Астанада ҚР Көлік министрлігі мен авиациялық IT-шешімдер бойынша әлемдік көшбасшы SITA компаниясы өкілдерінің жұмыс кездесуі өтті. Жеткізілген нәтижелерге сәйкес, SITA жүргізген аудит 14 мемлекеттік әуежайдың негізгі жүйелермен жабдықталу деңгейі қазіргі уақытта 38%-ды құрайтынын және көптеген үдерістердің әлі де қолмен орындалатынын көрсетті. Бұл көрсеткіш саланы толықтай автоматтандыру арқылы инфрақұрылымның өткізу қабілетін арттыруға үлкен мүмкіндік береді.
Жоба аясында жолаушыларды тіркеу, багажды өңдеу мен есепке алу жүйелері толықтай автоматтандырылады. Енгізілетін биометриялық сәйкестендіру технологиясы ұшу алдындағы рәсімдерден өту уақытын қысқартып, жолаушылар ағынын реттеуге және авиациялық қауіпсіздікті нығайтуға мүмкіндік береді.
Сондай-ақ Астанада барлық әуежайлардың жұмысын нақты уақыт режимінде үйлестіретін біртұтас орталықтандырылған басқару орталығын құру қарастырылуда. Ал Зайсан, Кендірлі және Катонқарағайда салынып жатқан жаңа әуежайлар құрылыс кезеңінен-ақ халықаралық стандарттарға сай цифрлық сервистермен қамтамасыз етіледі.
Бұл тарихи серіктестік еліміздің әуе көлігі саласын жаңа биікке көтеріп, әрбір жолаушыға заманауи, қауіпсіз әрі өте жайлы саяхат сыйлайтыны сөзсіз.
